بين الحياة و الموت .. وقفت
لأ هي كانت قاعدة
كتبت شوية كلام ..
لأ هى قالته بلسانها
اول ما مسكت الورقة و القلم
هربت منها الحروف
عرفت ان الحياة مالهاش معنى
و الاحلام
مجرد احلام ..أول ما تصحى من النوم
بتكون كلام فارغ
كانت زمان شايفة السما وردى مش زى ما بيقولوا زرقا
ولما طلت مـ الشباك عرفت انها بلون الحزن و الوجع
كل يوم ليها لون
نزلت دموعها على خدها
لأ .. هى بس اتمنت يكون ليها رد فعل انسانى ، لكن دموعها اتحجرت
حتى الوجع جواها بقى له قوانين تانية
بتبص حواليها
القاعدة واحدة ..إوعي تضعفي لأنك قوية
هى القوة ليها كام معنى ....؟
شافت حياتها من البداية للنهاية
يمكن تلاقى خطوة واحدة كانت بلون الفرح
كل اللى كان فى عنيها شوية أوراق خريف
...وقعت كل يوم واحدة
رجعت تدور عـ النجوم اللى كانت بتحب تعدها ..
لكنها هربت مـ السما
وقفت كما كانت فى نفس المكان ..
لأ هى كانت قاعدة
لأ هي كانت نايمة
ردحذف